د وزیر محمد محمد اکبر خان لومړۍ درجه ولایتي شل اوریزه سیالیو په لړ کې نن هم څلور لوبې ترسره شوې. د یادو لوبو په لړ کې ډومیسټیک ایلېون په ۵ منډو د کابل الف، خوست په ۳۸ منډو د پکتیکا، خوست ب په ۸ ویکټو د لوګر او چېرمېن ایلېون په ۱۰ منډو د کندهار الف لوبډلې له ماتې سره مخ کړې.
په کندهار کرکټ لوبغالي کې د خوست ب او لوګر
تر منځ لوبه چې د باران د ورښت له امله ۱۶ اورونو ته راکمه شوه، لوګر پکې د ۱۵۳
منډو هدف وټاکه. د دوی توپوهنه کې صابر حنیف ۴۷ او عزت نور ۲۶ منډې ترسره کړې. د
خوست ب په توپ اچونه کې نسیم منګل ۳، حسیب الله او هاشم خان ۲-۲ ویکټې په خپل نوم کړې.
د
لوګر لوبډلې هدف خوست ب لوبډلې د لوبې په وروستي اور کې د ۲ ویکټو په تاوان ترلاسه
کړی. د دوی توپوهنه کې اصغر اتل ۷۳ او رحمن ریحان ۵۵ منډې جوړې کړې. بلخوا د لوګر
توپ اچونه کې بخت محمد او محمد داود ۱-۱ ویکټ ترلاسه کړه.
د خوست ب لوبډلې پیلیز توپوهونکی اصغر اتل په
۷۳ ناسوځېدلو منډو جوړولو د لوبې غوره لوبغاړی شو.
د چېرمېن ایلېون او کندهار الف لوبډلو تر منځ
لوبه کې بیا چېرمېن ایلېون لوبډلې د ۱۰ منډو په توپیر بریا ترلاسه کړه. دغه لوبه
چې د باران له امله ۱۵ اوره ترسره شوه، چېرمېن ایلېون لوبډلې پکې د ۱۸۶ منډو لوی
هدف وټاکه. د دوی لپاره محب الله همراز په زړه پورې توپوهنه ترسره کړه او په دغه
لوبو کې د لومړنۍ سلیزې په جوړولو یې ۱۳۱ منډې په خپل نوم کړې. همدا راز فضل
عثماني هم ۲۸ منډې جوړې کړې. بلخوا د کندهار الف توپ اچونه کې عثمان ابدال ۲ ویکټې
ترلاسه کړې.
د چېرمېن ایلېون لوبډلې د ټاکلي هدف ځواب کې
کندهار الف لوبډلې د ټولو ویکټو په تاوان ۱۷۵ منډې جوړې کړې. د دوی لپاره عمران
مزاري ۷۳ او نعمان شاه ۵۱ منډې ترسره کړې. د چېرمېن ایلېون توپ اچونه کې اسدالله
متاڼي ۳ او محمد علي ۲ ویکټې ترلاسه کړې.
د لوبې غوره لوبغاړی د چېرمېن ایلېون پیلیز
توپوهونکی محب الله همراز ونومول شو.
د ننګرهار په نجیب الله تره کي لوبغالي کې
بیا ډومیسټیک ایلېون په ۵ منډو د کابل الف لوبډلې ته ماتې ورکړه. په یاده لوبه کې
ډومیسټیک ایلېون لوبډلې د ۲۰ اورونو په لوبولو د ۱۵۳ منډو هدف وټاکه. د دوی په ګټه
عبدالهادي ۵۹ او اسلام ځاځي ۵۰ منډې ترسره کړې. د کابل الف په توپ اچونه کې بیا
سید خان ۴ او سید احمد شېرزاد ۲ لوبغاړي د لوبې له ډګره بهر کړل.
د ډومیسټیک ایلېون لوبډلې د هدف ځواب کې کابل
الف لوبډلې د ټولوبو اورونو په لوبولو سره یوازې ۱۴۷ منډې جوړې کړې. د یادې لوبډلې
په ګټه عرفان الله ساپي ۲۹ او اسدالله دانش ۲۸ منډې جوړې کړې. د ډومیسټیک ایلېون
لوبډلې توپ اچوونکو کې لیس لونګ او محمد نبي هر یوه ۲ ویکټې په خپل نوم کړې.
د ډومیسټيک ایلېون لوبډلمشر عبدالهادي په ۵۹
منډو جوړولو سره د لوبې غوره لوبغاړی شو.
د ننګرهار په غازي امان الله خان لوبغالي کې
بیا خوست لوبډلې د ۳۸ منډو په توپیر د پکتیکا لوبډلې ته ماتې ورکړه. دغه لوبه کې
خوست لوبډلې لومړی د شمس الرحمن ۵۲ او نصیراحمد ۲۹ منډو پر مټ په ۲۰ اورونو کې د
۱۵۷ منډو هدف وټاکه. د پکتیکا لپاره عزیزالله ۴ او سمیع الله علیزوی ۳ ویکټې
ترلاسه کړې.
د خوست لوبډلې د هدف په ځواب کې پکتیکا
لوبډلې د لوبې په وروستي اور کې د خپلو ټولو ویکټو په تاوان سره ۱۱۸ منډې جوړې
کړې. د دوی توپوهنه کې کرامت الله ۵۵ منډې ترسره کړې. بلخوا د خوست لوبډلې توپ
اچونه کې شفیع الله ۳، یونس ځدراڼ، خلیل احمد او مصطفی سنګر هر یوه ۲ لوبغاړي د
لوبې له ډګره بهر کړل.
د خوست لوبډلې الراونډر یونس ځدراڼ د ۲۰ منډو
او ۲ ویکټو په ترلاسه کولو سره د لوبې غوره لوبغاړی ونومول شو.
د یادونې وړ ده، چې د وزیر محمد اکبر خان
لومړۍ درجه ولایتي شل اوریزه سیالیو په دوام به سبا سهار د کندهار کرکټ لوبغالي کې
خوست-ب د ننګرهار او د ننګرهار په غازي امان الله خان لوبغالي کې پکتیکا د ننګرهار
ب لوبډلو پر وړاندې د لوبو ډګر ته ښکته شي.